Спецтрыбунал па агрэсіі супраць Украіны падрыхтуе абвінаваўчае заключэнне для Лукашэнкі за здзейсненае ім злачынства агрэсіі

«Прыняты Статут Спецыяльнага трыбунала па агрэсіі супраць Украіны ўтрымлівае палажэнні, якія надаюць трыбуналу юрысдыкцыю ў дачыненні да злачынства агрэсіі супраць Украіны, здзейсненага Лукашэнкам. Трыбунал не прызнае функцыянальнага імунітэту беларускага дыктатара, а таксама не прызнае ніякіх магчымых амністый у дачыненні да яго за гэтае злачынства. Важна, што трыбунал будзе ў першую чаргу кіравацца нормамі міжнароднага права, у адпаведнасці з якімі факт здзяйснення злачынства агрэсіі Лукашэнкам з’яўляецца бесспрэчным», — адзначыў намеснік кіраўніцы Кабінета, кіраўнік НАУ Павел Латушка.

Статут Спецыяльнага трыбунала па злачынстве агрэсіі супраць Украіны быў распрацаваны на падставе пагаднення, якое сёння вечарам будзе падпісана Прэзідэнтам Украіны Уладзімірам Зяленскім і Генеральным сакратаром Савета Еўропы Аленам Берсе ў штаб-кватэры Савета Еўропы.

«Сёння можна адназначна сказаць: у дачыненні да беларускага дыктатара будзе падрыхтавана абвінаваўчае заключэнне за здзяйсненне злачынства агрэсіі супраць Украіны.

Варта падкрэсліць, што Спецтрыбунал з’яўляецца міжнародным, а не ўкраінскім. Гэта азначае, што ён будзе прымяняць украінскае нацыянальнае права толькі ў тым выпадку, калі канкрэтнае пытанне немагчыма вырашыць на падставе палажэнняў Статута, працэсуальных правілаў і правілаў даказвання, звычайнага міжнароднага права, міжнародных дагавораў і агульных прынцыпаў міжнароднага права.

То бок у першую чаргу будзе дзейнічаць міжнароднае права. 

Акрамя таго, у Статуце змяшчаецца адсылка да рэзалюцыі 3314 Генеральнай Асамблеі ААН, якую трыбунал павінен улічваць пры вызначэнні цяжару і маштабаў дзеянняў, што падпадаюць пад вызначэнне «акта агрэсіі». Дзеянні Лукашэнкі па прадастаўленні тэрыторыі Беларусі для агрэсіі Расіі супраць Украіны адпавядаюць гэтым крытэрам, тым больш што гэта прама пазначана як акт агрэсіі ў артыкуле 3 Рэзалюцыі 3314 Генеральнай Асамблеі ААН.

Суддзямі і пракурорамі будуць іншаземцы. Пры гэтым усе працэдуры ў дачыненні да Лукашэнкі могуць быць праведзены завочна.

Пакаранне ў выглядзе пазбаўлення волі будзе адбывацца ў дзяржаве, якая заключыць адпаведнае пагадненне са Спецтрыбуналам. Калі ніводная дзяржава не падпіша такое пагадненне, пакаранне можа адбывацца ва Украіне», — адзначыў Павел Латушка пасля ўступнага аналізу апублікаванага Статута.

Нагадаем, што раней на красавіцкай сесіі ПАРЕ па ініцыятыве Паўла Латушкі ў іншую рэзалюцыю ПАРЕ была ўключана папраўка, якая прадугледжвае неабходнасць распаўсюджвання юрысдыкцыі Спецтрыбунала па агрэсіі супраць Украіны на адпаведныя дзеянні вышэйшага ваенна-палітычнага кіраўніцтва рэжыму Лукашэнкі.

---