Пошук па сайце

Крыніца: тэлеграм-канал праваабарончага цэнтра «Вясна» Усіх іх збіраюцца прыцягнуць да крымінальнай адказнасці ў парадку спецыяльнай вытворчасці. Большасць з ідэнтыфікаваных з Варшавы (203 чалавекі). Таксама ведамства згадала, што ва ўдзельнікаў акцыяў будуць шукаць маёмасьць на тэрыторыі Беларусі, «у тым ліку зарэгістраваную на іншых асобаў».

«Лукашэнка, ажыццяўляючы тэрор супраць "нелаяльнага" яму насельніцтва, выйшаў далёка за межы Беларусі. Злачынства былі здзейсненыя на тэрыторыі як мінімум 30 краін-удзельніц Рымскага Статута. Гаворка ідзе пра злачынствы супраць чалавечнасці ў форме дэпартацыі і пераследу па палітычных матывах» , — адзначыў лідар фракцыі «Каманда Латушкі і Рух "За Свабоду"» Павел Латушка  падчас парламенцкіх слуханняў Каардынацыйнай Рады Беларусі, якія прайшлі 23 студзеня па ініцыятыве фракцыі «Каманда Латушкі і Рух "За Свабоду"». Павел Латушка падкрэсліў ключавыя пытанні апошніх 4 гадоў: Ці наступіць адказнасць для Аляксандра Лукашэнкі за гэтыя злачынствы?  Ці будуць хаця б часткова адноўлены правы ахвяр? Ці магчыма і як забяспечыць правасуддзе ў Беларусі? «Першае, на што неабходна звярнуць увагу, — гэта даступныя механізмы забеспячэння правасуддзя. Буду максімальна катэгарычным і адзначу, што такіх механізмаў усяго два: расследаванне гэтых злачынстваў у рамках нацыянальных сістэм правасуддзя на аснове прынцыпу ўніверсальнай юрысдыкцыі і расследаванне ў рамках працэдур Міжнароднага крымінальнага суда. Што датычыцца магчымасцяў расследавання гэтых злачынстваў на аснове прынцыпу ўніверсальнай юрысдыкцыі, важна звярнуць увагу на тое, што гэты механізм выключае магчымасць прыцягнення да адказнасці асоб, якія маюць персанальны імунітэт. Няхай нам гэта падабаецца ці не, але Лукашэнка карыстаецца гэтай прывілеяй. У гэтай сувязі абсалютным прыярытэтам для нас з’яўляецца механізм Міжнароднага крымінальнага суда» , — падкрэсліў Павел Латушка. Павел Латушка адзначыў, што карыстаючыся падобнай практыкай сітуацыі ў М’янме і Бангладэш, калі адна з краін не з’яўляецца ўдзельніцай Рымскага Статуту, было вырашана, што МКС вылодае юрысдыкцыяй па злачынствах, прадугледжаных Рымскім Статутам, калі хаця б адзін з іх элементаў быў здзейснены на тэрыторыі краін-удзельніц Рымскага Статута. Народнае антыкрызіснае ўпраўленне сабрала пераканаўчыя доказы таго, што здзейсненае Лукашэнкам злачынства дэпартацыі і пераслед па палітычных матывах як злачынства супраць чалавечнасці, падпадаюць пад юрысдыкцыю МКС. «2 кастрычніка 2024 года з'явілася афіцыйная інфармацыя аб запуску Офісам пракурора МКС папярэдняга расследавання "беларускай сітуацыі". Аднак канчатковы вынік шмат у чым залежыць ад таго, якія сведкі будуць у распараджэнні Офіса пракурора МКС. Кожны з нас можна садзейнічаць таму, каб сведчанні здейсненых злачынстваў былі перададзены ў МКС» , — адзначыў Павел Латушка. «Я хацеў бы звярнуцца да чальцоў Каардынацыйнай Рады і ўсіх беларусаў з просьбай дасылаць нам любую інфармацыю: дакументы, аўдыё/відэазапісы, любыя іншыя матэрыялы, якія могуць пацвердзіць факты арганізацыі Лукашэнкам і прадстаўнікамі яго рэжыму палітыкі пераследу беларускага грамадства і стварэння ўмоў, якія вымушаюць жыхароў Беларусі пакідаць сваю краіну. Дадзеныя матэрыялы будуць ацэнены і ў рамках усталяваных працэдур перададзены ў Офіс пракурора МКС. На дадзены момант каля 30 праваабарончых арганізацый узялі на сябе абавязак перадаць адпаведную інфармацыю ў Офіс пракурора МКС. Таксама надзвычай важныя заяўленыя пазіцыі іншых краін. У гэтай сувязі я звяртаюся да ўсіх членаў Каардынацыйнай Рады зрабіць усё магчымае ў камунікацыі з парламентарыямі краін-саюзнікаў, каб яны далучыліся да рэфералу Літвы ў МКС», — звярнуўся Павел Латушка да чальцоў і чалінь КР.

Прыняцце Сенатам Рэспублікі Польшча Рэзалюцыі па пытанні аб несумленных выбарах у Беларусі — гэта падзея, якая ўвойдзе ў гісторыю нашай краіны і барацьбы нашага народа і дэмакратычных сіл, якія яго прадстаўляюць, за свабоду і дэмакратыю. Упершыню ў нашай сучаснай гісторыі верхняй палатай нацыянальнага парламента замежнай дзяржавы — Сенатам Польшчы — прадстаўнічы орган беларускіх дэмакратычных сіл — Каардынацыйная Рада — быў прызнаны беларускім парламентам на эміграцыі. Гэта ўжо зафіксаваны факт. І гэты факт, гэтая падзея ўвойдзе ў падручнікі гісторыі дэмакратычнай Беларусі. Акрамя таго, дадзенай Рэзалюцыяй польскі Сенат дэкларуе гатоўнасць да супрацоўніцтва з прадстаўнікамі Каардынацыйнай Рады. Для мяне асабіста няма лепшага адказу ўсім тым, хто абраў шлях барацьбы не з дыктатурай Лукашэнкі, а са створанымі, дзейнымі і прызнанымі дэмакратычнымі краінамі інстытутамі беларускіх дэмакратычных сіл. Разам з тым, для ўсіх нас, прадстаўнікоў Каардынацыйнай Рады, Аб'яднанага Пераходнага Кабінета і іншых арганізацый і структур беларускіх дэмсіл і грамадзянскай супольнасці, гэтая падзея павінна стаць велізарнай матывацыяй працягваць актыўную барацьбу за свабоду і дэмакратыю ў Беларусі, развіваць і ўмацоўваць нашыя інстытуты, іх прызнанне і ўплыў на міжнароднай арэне. І мы ўжо гэта робім і дабіваемся сур'ёзных поспехаў. Раней Каардынацыйная Рада як прадстаўнічы орган была прызнаная партнёрам для супрацоўніцтва Парламенцкай асамблеяй Рады Еўропы. І ўжо хуткім часам дэлегацыя Каардынацыйнай Рады, у якую я маю гонар уваходзіць, адправіцца ў Страсбург на першую сесію ПАРЕ 27-31 студзеня, каб таксама ўпершыню ў гісторыі прадстаўляць Беларусь на такім высокім узроўні. Я віншую калег па Каардынацыйнай Радзе і ўсім дэмакратычным руху з гэтымі найважнейшымі падзеямі ў нашай гісторыі, якую мы ствараем разам. Не хачу гучаць пафасна, але нам сапраўды выпала гістарычная місія і мы абавязаны весці нашу барацьбу да дасягнення нашай агульнай мэты – свабоднай, дэмакратычнай і еўрапейскай Беларусі. Жыве Беларусь!

— Арцём Брухан, намеснік прадстаўніка па транзіце ўлады Кабінета, — да рэгіянальных чыноўнікаў Беларусі: «На нашых вачах праходзяць так званыя "выбары" ў Беларусі — звычайная імітацыя, інструмент захавання ўлады састарэлым дыктатарам. Што адбываецца на месцах, лепш за іншых ведаеце менавіта вы, рэгіянальныя чыноўнікі. Вы штодня сутыкаецеся з рэальнымі праблемамі людзей. І сёння, у момант, калі будучыня Беларусі стаіць перад пагрозай страты суверэнітэту, ваша роля асабліва важная. Пры гэтым чамусьці прапагандысты гавораць, што ў выпадку няўдач ва ўсіх праблемах вінаватыя вы , а не Лукашэнка. Калі перамены прыйдуць — а яны непазбежныя, гісторыя гэта даказала шматкроць, — менавіта мясцовыя ўлады стануць ключавым звяном у працэсе аднаўлення краіны . Гэта магчымасць для вас стаць сапраўднымі лідарамі, блізкімі да людзей. Ва ўмовах транзіту ўлады і дэмакратычных перамен рэгіянальныя ўлады павінны атрымаць больш паўнамоцтваў і рэсурсаў  для рэальнага вырашэння праблем на месцах. Цяпер перад вамі стаіць выбар: застацца часткай сістэмы, якая працуе на знішчэнне даверу да інстытутаў улады і ў выніку сысці ў нябыт разам з ёй, ці ўжо сёння пачаць рыхтавацца да пабудовы Беларусі, дзе за меркаванне не саджаюць у турму і не звальняюць з працы за тое, што твой сваяк цікавіцца палітыкай, — Беларусі, дзе кожны чыноўнік працуе для людзей, а не супраць іх. Вы можаце бяспечна выказаць свой пратэст супраць таго, што вас прызначаюць крайнімі за ўсе праблемы. Прыслухайцеся да галасоў сваіх суграмадзян. Пастаўце знак у графе «супраць усіх». А калі ў вас будзе магчымасць — зафіксуйце рэальныя вынікі для будучыні.

Аляксандр Лукашэнка. Фота: president.gov.by Я ўжо неяк казаў, што шукаць у хаатычных дзеяннях дыктатара нейкія таемныя пасланні ці сігналы і спрабаваць іх расшыфраваць — справа няўдзячная і, напэўна, бессэнсоўная. Адказ на пытанне — чаго хоча Лукашэнка? — даволі просты. Ён хоча ўсё або нічога.  Альбо ён захоўвае абсалютную ўладу, не нясе ніякай адказнасці, і з яго рэжыму здымаюцца ўсе санкцыі, альбо хай гарыць Беларусь і яе незалежнасць сінім полымем. Ён не хоча ніякага дыялогу ні з Захадам, ні тым больш з «беглымі», што б ён там ні пісаў у сваёй «прадвыбарнай праграме». Ён не хоча сустракацца нават на палове шляху. Усё або нічога. Але ці хочуць таго ж беларусы, прычым нават з яго бліжэйшага акружэння? Дакладна не. І яго словы пра «чакаюць, калі здохну — не дачакаецеся» скіраваныя да іх гэтак жа, як і да нас, дэмакратычных сіл. Таму што і мы, і яны хочам, каб яго не было. Таму што беларусы заўсёды дамовяцца з беларусамі. Беларус беларусу — беларус, а Лукашэнка беларусу — костка ў горле. Таму давайце перастанем думаць пра тое, чаго хоча Лукашэнка. І пачнем думаць і гаварыць пра тое, чаго хочам мы, беларусы. Па абодва бакі мяжы і па абодва бакі палітычных барыкад.

Muzeum Białoruskie w Hajnówce — film promocyjny Намеснік кіраўніцы Аб’яднанага Пераходнага Кабінета, кіраўнік Народнага антыкрызіснага ўпраўлення Павел Латушка  наведаў Музей і Асяродак Беларускай Культуры ў Гайнаўцы, які быў створаны больш за 40 гадоў таму. Яшчэ на пачатку стварэння Музея і Асяродка Беларускай Культуры дапамогу ў яго пабудове ажыццяўляў урад БССР, а пазней у пачатку 90-х ХХ ст. — урад незалежнай Беларусі. Павел Латушка, працуючы Паслом Беларусі ў Польшчы і Міністрам культуры, на працягу многіх гадоў аказваў як арганізацыйную, так і матэр’яльную падтрымку дзейнасці Музея ў Гайнаўцы. Падчас наведвання і сустрэчы Паўла Латушкі з дырэктарам музея Томашам Ціханюком  былі абмеркаваны магчымасці супрацоўніцтва з Музеем Вольнай Беларусі ў Варшаве, які з’яўляецца культурніцкім праектам Народнага антыкрызіснага ўпраўлення. Узаемадзеянне з Музеем і Асяродкам беларускай культуры ў Гайнаўцы можа ажыццяўляцца ў тым ліку і праз арганізацыю сумесных культурных і творчых праектаў, выстаў твораў мастацтва, канцэртаў, тэатральных пастановак, кінапаказаў і г.д. Павел Латушка адзначыў, што для Аб’яднанага Пераходнага Кабінета Беларусі важна спрыянне шырокаму ўзаемадзеянню беларускай меншасці, якая пражывае ў Польшчы, і беларускай дыяспары — беларусаў, якія вымушаны былі пакінуць тэрыторыю Беларусі і сёння легалізуюць сваё знаходжанне ў Польшчы. Павел Латушка дамовіўся з дырэктарам музея Томашам Ціханюком, што ў бліжэйшы час будзе прапрацавана магчымасць арганізацыі выставы выяўленчага мастацтва са збораў Музея і Асяродка Беларускай Культуры ў Гайнаўцы ў Музеі Вольнай Беларусі ў Варшаве. У зборах Гайнаўскага музея знаходзяцца творы больш за 40 беларускіх мастакоў, якія нарадзіліся ў Польшчы, а таксама прадстаўнікоў беларускай дыяспары. Томаш Ціханюк распавёў гісторыю пра тое, як музей нядаўна наведала беларуская сям’я, якая 4 гады таму была вымушана пакінуць Беларусь. Пасля наведвання музея яны пакінулі водгук, у якім адзначылі, што атмасфера музея нагадала ім пачуццё знаходжання ў Беларусі, на Радзіме. Вельмі важна, каб прадстаўнікі беларускай дыяспары знаёміліся з культурнай спадчынай, якую рупліва захоўвае і развівае беларуская меншасць у Польшчы, наведвалі такія асяродкі, як музей у Гайнаўцы. Дырэктар Музея прыгадаў, што Павел Латушка, калі быў амбасадарам Беларусі ў Польшчы, ініцыяваў адкрыццё на будынку Музея і Асяродка Беларускай Культуры ў Гайнаўцы памятнай дошкі, прысвечанай 125-годдзю народных паэтаў Беларусі Янкі Купалы і Якуба Коласа, а таксама стаў ініцыятарам надання вуліцам горада Гайнаўка імёнаў Янкі Купалы і Якуба Коласа ў 2007 годзе.

«Захаванне беларускай меншасцю ў Польшчы беларускай мовы, культуры, шанаванне сваіх каранёў — выдатны прыклад для нас усіх, беларусаў» , — адзначыў намеснік кіраўніцы Аб'яднанага Пераходнага Кабінета Беларусі, кіраўнік Народнага антыкрызіснага ўпраўлення Павел Латушка  сёння падчас наведвання Агульнаадукацыйнага ліцэя з дадатковым навучаннем беларускай мовы ў Гайнаўцы.  У ліцэі Павел Латушка правёў сустрэчы з дырэктарам ліцэя Ігарам Лукашуком , з кіраўніцтвам Гайнаўскага павета, з настаўнікамі беларускай мовы і гісторыі, з кіраўніцтвам рады бацькоў, прадстаўнікамі Цэнтра беларускай культуры ў Беластоку і арганізацый беларускай меншасці. Падчас сустрэчы былі абмеркаваныя пытанні дзейнасці Гайнаўскага ліцэя з дадатковым навучаннем беларускай мовы, пытанні падтрымкі ліцэя з боку Аб'яднанага Пераходнага Кабінета Беларусі, захавання і развіцця магчымасцяў для прадстаўнікоў беларускай меншасці ў вывучэнні беларускай мовы і захаванні беларускіх традыцый. У Гайнаўскім ліцэі беларускую мову вывучаюць больш за 300 вучняў, ліцэй з'яўляецца адным з лепшых у Падляскім ваяводстве і карыстаецца вялікай папулярнасцю для паступлення. У ліцэі дзейнічаюць беларускія музычныя і тэатральныя калектывы. Ліцэй выкарыстоўвае бел-чырвона-белую сімволіку ў аздабленні памяшканняў навучальнай установы. У 2024 годзе ліцэй адзначыў 75-годдзе з даты стварэння. Павел Латушка наведаў Гайнаўскі ліцэй з дадатковым навучаннем беларускай мовы ў тым ліку па выніках сустрэчы прадстаўнікоў Аб'яднанага Пераходнага Кабінета з міністаркай нацыянальнай адукацыі Польшчы Барбарай Навацкай, якая адбылася ў Варшаве 9 студзеня.

Павел Латушка аб значэнні старшынства Польшчы ў ЕС Павел Латушка, прадстаўляючы Аб'яднаны Пераходны Кабінет, прыняў удзел у афіцыйнай інаўгурацыі пачатку старшынства Польшчы ў Радзе ЕС, на запрашэнне міністра па справах ЕС Польшчы Адама Шлапкі   «Ад імя Аб'яднанага Пераходнага Кабінета, выканаўчага органа дэмакратычных сіл Беларусі, я хацеў бы выказаць удзячнасць міністру замежных спраў Польшчы Радаславу Сікорскаму , які ў сваёй прэзентацыі прыярытэтаў польскага старшынства ў ЕС асабліва падкрэсліў важнасць рэалізацыі падыходу "no business as usual" у дачыненні да рэжыму Лукашэнкі. Гэта можа стаць асновай для далейшых дзеянняў, у тым ліку супрацоўніцтва Польшчы з дэмакратычнымі інстытутамі і ініцыятывамі беларускай грамадзянскай супольнасці як падчас старшынства Польшчы ў ЕС, так і пасля яго. У інтарэсах абсалютнай большасці беларусаў — дэмакратычная, незалежная, суверэнная Беларусь, што, я перакананы, адпавядае і нацыянальным інтарэсам Польшчы, якая суседнічае з Беларуссю. На гэтым супадзенні інтарэсаў можа грунтавацца наша агульная стратэгія, якая падкрэслівае важнасць дэмакратычных змен у Беларусі. Для дэмакратычных сіл Беларусі важнай з’яўляецца сістэмная праца па папулярызацыі сумесна са структурамі ЕС еўрапейскай перспектывы для беларусаў» , — адзначыў намеснік кіраўніцы Кабінета Павел Латушка . Ён таксама акцэнтаваў увагу, што дэмакратычныя сілы вызначылі шэраг прыярытэтаў на найбліжэйшы час, у рэалізацыі якіх важная падтрымка ЕС і польскага старшынства ў ЕС: непрызнанне фарсу, які арганізуецца Лукашэнкам 26 студзеня пад выглядам выбараў, недапушчэнне вяртання міжнароднай суб’ектнасці Лукашэнкі; прыцягненне Лукашэнкі да адказнасці за злачынствы супраць чалавечнасці ў дачыненні да беларускага народа, а таксама за ваенныя злачынствы супраць украінскіх дзяцей; прадстаўленасць голасу беларускіх дэмакратычных сіл у выпадку правядзення перамоў па сітуацыі ва Украіне, што можа ажыццяўляцца праз прамы ўдзел дэмакратычных сіл ці праз старшынства Польшчы ў ЕС, а таксама недапушчэнне да магчымых перамоў дыктатара Лукашэнкі, які цалкам страціў права прадстаўляць інтарэсы беларусаў і ўжо не адновіць яго. Павел Латушка падкрэсліў, што падчас старшынства Польшчы ў ЕС важным застанецца пытанне паляпшэння магчымасці мабільнасці для беларусаў, а таксама працяг у садзейнічанні выдачы віз у краіны ЕС для камунікацыі беларускага грамадства з Еўропай. Важна таксама павялічваць колькасць адукацыйных стыпендый для беларусаў у Еўропе, падтрымку незалежных СМІ і блогераў, падтрымліваць нацыянальную культуру і беларускую ідэнтычнасць у процівагу палітыцы рэжыму Лукашэнкі і Расіі, накіраванай на прапаганду «рускага свету» ў беларускім грамадстве. Таксама Павел Латушка адзначыў важнасць правядзення 3-4 лютага 2025 года па ініцыятыве МЗС Польшчы Касцюшкаўскага форуму ў Еўрапейскім цэнтры Салідарнасці ў Гданьску, прысвечанага падтрымцы грамадзянскай супольнасці ў Беларусі. «Я спадзяюся, што лідарства Польшчы ў ЕС дазволіць звярнуць увагу еўрапейскіх партнёраў на масавыя рэпрэсіі і парушэнні правоў чалавека ў Беларусі, а таксама ўзмоцніць стратэгію ЕС у мэтах пошуку рашэнняў і інструментаў для пераадолення гуманітарнага крызісу ў Беларусі і пасадзейнічае вызваленню палітвязняў. Будзе ўзмоцнены ціск на пануючы ў Беларусі рэжым. Я таксама ўдзячны Польшчы і польскаму ўраду, польскаму грамадству за тую вялікую дапамогу, якая была аказаная і працягвае аказвацца для нас, як для беларускага грамадства, так і для дэмакратычных сіл у гэты складаны лёсавызначальны перыяд для Беларусі», — адзначыў Павел Латушка. Падчас інаўгурацыі Павел Латушка правёў размовы з кіраўнікамі Сейма і Сената, членамі ўрада Польшчы, еўрадэпутатамі ад Польшчы аб планах сумесных мерапрыемстваў падчас старшынства Польшчы ў ЕС.

Адказнасць рэжыму, дапамога палітвязням, міжнароднае прызнанне дэмсілаў Павел Латушка, намеснік кіраўніцы Аб’яднанага пераходнага кабінета, кіраўнік Народнага антыкрызіснага ўпраўлення, член Каардынацыйнай рады, надзвычайны і паўнамоцны амбасадар — спецыяльна для «Позірку» Арыгінал артыкула: pozirk.online Узурпатар на шляху ў Гаагу Упершыню ў гісторыі нашай краіны афіцыйна адкрытая магчымасць перадачы ў офіс пракурора Міжнароднага крымінальнага суда матэрыялаў аб учыненых прадстаўнікамі рэжыму Лукашэнкі злачынствах супраць чалавечнасці ў дачыненні да беларускага народа. Мэта — пачатак следства, выдача ордара на арышт Лукашэнкі і ягоных саўдзельнікаў, а таксама прыцягненне іх да адказнасці за злачынствы супраць беларусаў. З усіх санкцыйных рашэнняў я б асабліва вылучыў тых, каго можна назваць «пярэваратнямі ў мантыях». На аснове матэрыялаў, падрыхтаваных і перададзеных камандай НАУ, Еўрапейскі саюз увёў санкцыі супраць 24 суддзяў рэжыму, а таксама 10 супрацоўнікаў пенітэнцыярнай сістэмы і трох прапагандыстаў. Мы будзем дэманстраваць так званым суддзям, што, валодаючы вышэйшай юрыдычнай адукацыяй, яны выдатна ведаюць, што здзяйсняюць злачынствы. Унясенне іх у санкцыйныя спісы — першы крок на шляху іх прыцягнення да крымінальнай адказнасці. Сярод санкцый асаблівую ўвагу варта надаць абмежаванню выкарыстання самалётаў Лукашэнкі. 9 жніўня прапановы і абгрунтаванні каманды НАУ знайшлі адлюстраванне ў санкцыях ЗША супраць борта дыктатара № 1 — Boeing 767, што завяршыла нашу працу па ўвядзенні санкцый на ўсе паветраныя судны Лукашэнкі. Сёння пад санкцыямі знаходзяцца чатыры самалёты і адзін верталёт дыктатара. Нам было важна накіраваць яму персанальны сігнал, які падкрэслівае яго асабістую адказнасць за тое, што адбываецца. Лукашэнка будзе ўсё складаней працягваць карыстацца выгодамі і прывілеямі, якія ён незаконна стварыў для сябе і сваёй сям’і. Асобна варта адзначыць важнасць значнай гарманізацыі санкцый супраць Расіі і рэжыму Лукашэнкі, практычна на 60%. Гэта скарачае магчымасці абыходу ў інтарэсах Расіі раней накладзеных абмежаванняў і ўзмацняе ціск на рэжым Лукашэнкі. Істотным крокам стала абмежаванне транзіту санкцыйных тавараў праз Беларусь. НАУ сумесна з іншымі беларускімі ініцыятывамі, у тым ліку BelPol і Беларускім расследавальніцкім цэнтрам, дакументальна зафіксавала злоўжыванні транзітнымі схемамі, якія выкарыстоўвае рэжым для абыходу санкцый. Нашы доказы знайшлі адлюстраванне ў прававых нормах, замацаваных рашэннем Савета ЕС ад 29 чэрвеня 2024 года, якое істотна ўскладніла выкарыстанне ілжывых транзітных маршрутаў. Таксама прынцыпова важнымі сталі санкцыі супраць сістэмы перадачы фінансавых паведамленняў Банка Расіі (СПФП). Нашае абгрунтаванне, перададзенае яшчэ ў снежні 2023 года ў Брусэль аб неабходнасці санкцый супраць СПФП — сістэмы, якая выкарыстоўваецца для абыходу ўведзеных фінансавых санкцый і аплаты санкцыйных тавараў, неабходных для ВПК РФ у агрэсіі супраць Украіны, — было ўлічана ў 14-м пакеце санкцый ЕС супраць Расіі ад 24 чэрвеня 2024 года. Падтрымка палітвязняў і барацьба за іх вызваленне У працы Офіса Святланы Ціханоўскай і Аб’яднанага пераходнага кабінета (АПК) важным дасягненнем стала стварэнне Міжнароднага гуманітарнага фонду для дапамогі палітычным зняволеным і іх сем’ям, а таксама правядзенне міжнароднай кампаніі за вызваленне палітычных зняволеных, перш за ўсё з гуманітарнага спісу; правядзенне міжнародных дзён салідарнасці. Вызвалена больш за 200 палітзняволеных, але гэта толькі маленькая частка вязняў. Адначасова мы разумеем, што нашая барацьба — гэта спрынтамарафон з перманентнымі перашкодамі, якія стварае сам рэжым. У цяперашняй сітуацыі галоўная праблема — прынцып умоўнай ратацыі, які рэалізуе рэжым, вызваляючы адных і адначасова кідаючы ў засценкі новых ні ў чым не вінаватых беларусаў. У снежні 2024 года былі арганізаваныя беспрэцэдэнтныя Дні Беларусі ў Бруселі, у рамках якіх прайшла канферэнцыя высокага ўзроўню Еўрапейскага парламента ў падтрымку народа Беларусі. На канферэнцыі, у якой узялі ўдзел прадстаўнікі дэмакратычных інстытутаў Беларусі і беларускай грамадзянскай супольнасці, а таксама прэзідэнт Еўрапейскага парламента Раберта Метсола і еўрадэпутаты, шэраг еўракамісараў, была падкрэсленая прынцыповая падтрымка Еўрасаюзам дэмакратычных памкненняў беларусаў. Устойлівасць інстытутаў дэмакратычных сіл На пачатку жніўня 2024 года адбылася канферэнцыя «Новая Беларусь», у рамках якой былі падпісаныя важныя стратэгічныя дакументы: Пратакол узаемадзеяння, Дэкларацыя аб адказнасці і аднаўленні справядлівасці, Дэкларацыя аб знешнепалітычных прыярытэтах дэмакратычнай Беларусі. Таксама прынятая «Платформа 2025», якая аб’ядноўвае падыход усіх дэмакратычных сіл Беларусі да так званых выбараў у 2025 годзе. Важна, што для рэалізацыі агульнай стратэгіі мы здолелі прадэманстраваць устойлівасць інстытутаў дэмакратычных сіл. Гэта беспрэцэдэнтнае дасягненне для гісторыі Еўропы: нягледзячы на вымушанае выгнанне, існуюць і дзейнічаюць інстытуты абранага прэзідэнта (прэзідэнт-элект), Аб’яднаны пераходны кабінет як выканаўчы орган, а таксама Каардынацыйная рада як прадстаўнічы орган. Нас успрымаюць у якасці паўнапраўных партнёраў, менавіта таму праведзеныя стратэгічныя дыялогі са Злучанымі Штатамі Амерыкі і Еўрапейскай камісіяй, аналагічныя тым, якія ЗША і Еўрасаюз вядуць з урадамі іншых краін. У дадзеным выпадку — з прадстаўнікамі дэмакратычных інстытутаў Беларусі. Мы таксама пачалі стратэгічны дыялог з Канадай і плануем запусціць аналагічны працэс з Вялікабрытаніяй. Першыя рэальныя выбары прадстаўнічага органа Мы ўпершыню абралі прадстаўнічы орган Беларусі. Для Каардынацыйнай рады гэта, безумоўна, гістарычны момант. На жаль, удзел у галасаванні узяла адносна невялікая колькасць беларусаў. Гэта звязана як з аб’ектыўнымі, так і з суб’ектыўнымі прычынамі. Адным з фактараў, якія перашкаджаюць удзелу ў выбарах, стаў недавер сістэме падліку галасоў. Але сам факт, што ніхто з тых, хто узяў удзел у самім галасаванні, не быў ідэнтыфікаваны і прыцягнуты да адказнасці, дэманструе, што сістэма працуе і мы ўпершыню атрымалі прадстаўнічы орган. Для мяне і нашай кааліцыі ў КР гэта азначае, што мы прадстаўляем пазіцыю каля 2.400 выбаршчыкаў, якія падтрымалі нашу праграму. Мы атрымалі 35% мандатаў. І гэта прадстаўнічы орган, упершыню за дзесяцігоддзі сфармаваны дэмакратычным шляхам. Асабліва важна, што найбуйнейшая міжнародная парламенцкая арганізацыя — Парламенцкая асамблея Савета Еўропы (ПАСЕ) — прызнала статус прадстаўнічага органа Каардынацыйнай рады. І ўпершыню ў гісторыі запрасіла афіцыйную дэлегацыю КР узяць удзел у сесіі ПАСЕ ў студзені 2025 года. Гэта беспрэцэдэнтна. Кажу як былы амбасадар, які адказваў за працу місіі Беларусі пры СЕ да 2019 года. Дапамога беларусам за мяжой Мы здолелі аднавіць дзейнасць рабочай групы па пытаннях, звязаных са знаходжаннем грамадзян Беларусі ў Польшчы, паміж Міністэрствам унутраных спраў і адміністрацыі Польшчы і прадстаўнікамі беларускіх дэмакратычных сіл. У склад групы ўключаная мая кандыдатура, а таксама Віталь Малчанаў ад прадстаўніцтва АПК па сацыяльных пытаннях. Акрамя таго, створана рабочая група па пытаннях супрацоўніцтва з няўрадавымі арганізацыямі, заснаваная міжведамаснай рабочай групай Польшчы па пытаннях міграцыі. У яе склад увойдуць прадстаўнікі розных арганізацый дыяспары, а ў якасці прадстаўніка АПК — Арцём Праскаловіч. Гэтая дзейнасць фактычна накіраваная на штодзённае развязанне пытанняў, звязаных з легалізацыяй беларусаў за мяжой. Асобна мы сумесна з асацыяцыяй «Да Волі» надалі падтрымку ў атрыманні 126 віз, у тым ліку 117 гуманітарных віз для беларусаў, якіх пераследуе рэжым Лукашэнкі; і пры неабходнасці — эвакуацыяй беларусаў з тэрыторыі краіны. На жаль, легалізацыя дагэтуль застаецца праблемай. Мы адстойваем інтарэсы беларускіх добраахвотнікаў ва Украіне, але іншыя краіны абмяжоўваюць магчымасць іх легалізацыі, кіруючыся падыходамі нацыянальнай бяспекі. Пра вечныя каштоўнасці У 2024 годзе працягнуў дзейнасць праект каманды Народнага антыкрызіснага ўпраўлення — Музей вольнай Беларусі. За год праведзена больш за 100 культурна-адукацыйных мерапрыемстваў, удзельнікамі якіх стала больш за 8,5 тыс. чалавек, аб’ём фонду музея перавысіў 300 арыгінальных экспанатаў з найноўшай гісторыі беларускага пратэсту. Умацаваліся міжнародныя сувязі музея — устаноўленыя партнёрскія адносіны з прадстаўнікамі амбасадаў больш за 20 краін свету, а таксама з Сеймам, Сенатам, Міністэрствам замежных спраў, Міністэрствам культуры і нацыянальнай спадчыны Польшчы, мэрыяй Варшавы.

Вынікі працы па прававым накірунку: 2 кастрычніка Офіс пракурора Міжнароднага крымінальнага суда пачаў папярэдняе расследаванне «беларускай сітуацыі», што з'яўляецца вынікам працы НАУ, якое рыхтавала матэрыялы для перадачы ўладам Літвы. Урад Літвы накіраваў адпаведны зварот у Міжнародны крымінальны суд. Сістэма міжнароднага правасуддзя пачала сваю працу па злачынствах супраць беларусаў — і гэта важны вынік нашай працы. Праведзена работа, якая дазваляе разлічваць, што ўжо ў пачатку 2025 года можа быць запушчаны адзін з механізмаў АБСЕ для маніторынгу злачынстваў у Беларусі. Вынікі бягучага года таксама дазваляюць разлічваць, што ў 2025 гаду супраць рэжыму Лукашэнкі будзе ініцыяваны спор у Міжнародным судзе ААН, які дазволіць прыцягнуць яго да адказнасці. У Варшаве адбыўся арганізаваны НАУ сайд-івэнт у рамках Варшаўскай канферэнцыі па правах чалавека на тэму «Мабілізацыя Маскоўскага механізму АБСЕ для вывучэння прымусовага перамяшчэння беларусаў і іх экстратэрытарыяльнага пераследу» для прыцягнення максімальна шырокай міжнароднай увагі да злачынстваў прадстаўнікоў рэжыму Лукашэнкі супраць беларусаў. 2 снежня ў горадзе Гаага ўпершыню ў рамках сесіі Асамблеі Міжнароднага крымінальнага суда адбылося спецыяльна арганізаванае мерапрыемства, прысвечанае перспектывам разгляду ў МКС «беларускай сітуацыі»: «Беларуская сітуацыя ў МКС: юрысдыкцыя МКС і неабходнасць падтрымкі дзяржавамі-ўдзельніцамі». Нацыянальная пракуратура Польшчы 4 верасня прыняла пастанову аб арышце трох грамадзян Беларусі, падазраваных у здзяйсненні злачынства, звязанага з захопам грамадзянскага самалёта Ryanair: былога дырэктара дзяржаўнага прадпрыемства «Белаэранавігацыя» Леаніда Чура, начальніка змены ў авіякантрольнай службе Яўгена Цыганова і высокапастаўленага афіцэра КДБ, прозвішча якога таксама вядома. Вынікі працы па накірунку санкцыйнага ціску: У 2024 годзе Народнае антыкрызіснае ўпраўленне ініцыявала і падрыхтавала абгрунтаванне прыняцця шэрагу міжнародных санкцый і абмежавальных мер супраць рэжыму Лукашэнкі і яго хаўруснікаў. Санкцыі супраць асабістага самалёта Аляксандра Лукашэнкі.  9 жніўня прапановы і абгрунтаванні каманды НАУ знайшлі адлюстраванне ў санкцыях ЗША супраць самалёта дыктатара №1 — Boeing 767, што завяршыла нашу працу па ўвядзенні санкцый на ўсе паветраныя судны Лукашэнкі. Сёння пад санкцыямі знаходзяцца 4 самалёты і 1 верталёт дыктатара. Гарманізацыя санкцый супраць рэжыму Лукашэнкі і Расіі . НАУ неаднойчы ўносіла прапановы ўвядзення ўзгодненых мер і гэтыя прапановы былі ўлічаны ў рашэнні Савета ЕС ад 29 чэрвеня 2024 года, які выключае магчымасць заробку рэжымам на абыходзе абмежаванняў, якія ўжываюцца да ВПК Расіі. Абмежаванне транзіту падсанкцыйных тавараў праз Беларусь.  НАУ дакументальна зафіксавала злоўжыванні транзітнымі схемамі, якія ўжываюцца рэжымам для абыходу санкцый. Нашы доказы знайшлі адлюстраванне ў прававых нормах, замацаваных рашэннем Савета ЕС ад 29 чэрвеня 2024 года, якое істотна ўскладніла выкарыстанне «ілжывых» транзітных маршрутаў. Санкцыі супраць Сістэмы перадачы фінансавых паведамленняў Банка Расіі (СПФС) . Наша абгрунтаванне неабходнасці санкцый супраць СПФС — сістэмы, якая выкарыстоўваецца для абыходу ўведзеных фінансавых санкцый і аплаты падсанкцыйных тавараў, неабходных ВПК РФ для агрэсіі — было ўлічана ў 14-м пакеце санкцый ЕС супраць Расіі ад 24 чэрвеня 2024 года. Санкцыі ЕС супраць асобных прадстаўнікоў рэжыму: На падставе дас’е, падрыхтаваных і перададзеных камандай НАУ, Еўрапейскім саюзам уведзеныя санкцыі супраць: 24 суддзяў рэжыму, 10 супрацоўнікаў пенітэнцыярнай сістэмы, 3 вядучых прапагандыстаў. Дадатковыя санкцыі, прынятыя саюзнікамі ЕС на падставе прапаноў НАУ і іншых дэмакратычных ініцыятыў: ЗША (9 жніўня): супраць прадпрыемстваў ВПК і іх кіраўнікоў; Канада (9 жніўня): супраць суддзяў, ваенных рэжыму і прадпрыемстваў ВПК; Вялікабрытанія (3 кастрычніка): супраць ЗАТ «Альфа-банк»; Новая Зеландыя (24 верасня): супраць кіраўніка Беларускага Таварыства Чырвонага Крыжа, «БелОМА» і Аршанскага авіярамонтнага завода. Акрамя таго, дзякуючы нашым ініцыятывам, ЕС, ЗША і Канада ўвялі санкцыі ў дачыненні да Аляксея Талая і яго фонда, БРСМ, кіраўніка гэтай арганізацыі Аляксандра Лук'янава, а таксама дзяржсакратара Саюзнай дзяржавы Беларусі і Расіі Дзмітрыя Мезенцава  — усе яны датычныя да ваеннага злачынства: незаконнага перамяшчэння ўкраінскіх дзяцей на тэрыторыю Беларусі. Таксама 8 верасня 2024 года НАУ перадало ў МУС Польшчы матэрыялы для ўвядзення нацыянальных санкцый у дачыненні да 20 сілавікоў і 26 прапагандыстаў  рэжыму Лукашэнкі за развязаную міграцыйную вайну. Вынікі працы Музея Вольнай Беларусі — праекта НАУ У 2024 годзе працягнуў сваю дзейнасць праект каманды Народнага антыкрызіснага ўпраўлення — Музей Вольнай Беларусі, які знаходзіцца па адрасе Варшава, ul. Foksal, 11.  Праведзена больш за 150 культурна-адукацыйных мерапрыемстваў, удзельнікамі якіх сталі больш за 8,5 тысяч чалавек. Аб’ём фонду музея перавысіў 300 арыгінальных экспанатаў з найноўшай гісторыі беларускага пратэсту. Упершыню адбыліся экспазіцыі з уласных фондаў музея — фотапраект Сяргея і Дзмітрыя Брушко «REVISION 30» і «Несціхаючыя галасы» — праект, прысвечаны ролі жанчын у беларускім дэмакратычным руху. Выйшаў у друку першы Каталог артэфактаў Музея Вольнай Беларусі. Узмацніліся міжнародныя сувязі музея: устаноўлены партнёрскія стасункі музея з прадстаўнікамі амбасад больш як 20 краін свету, а таксама Сейма, Сената, Міністэрства замежных спраў, Міністэрства культуры і нацыянальнай спадчыны Польшчы, Варшаўскай мэрыі.  НАУ і Музею Вольнай Беларусі ўдалося сабраць спонсарскія сродкі ў памеры звыш 2 300 еўра і выдаць кнігу аднаго з вядомых беларускіх аўтараў, які зараз жыве ў замежжы, а таксама сабраць сродкі ў памеры 12 250 еўра на пастаноўку спектакля тэатральнай трупы «Вольныя Купалаўцы», падрыхтоўка якога распачата ў снежні бягучага года. Вынікі працы праекта «Кадравы Рэзерв»: Арганізаваны 2 адукацыйныя візіты, якія дазволілі ўдзельнікам пазнаёміцца з працай дзяржадміністрацыі ў Літве і еўрапейскіх інстытуцый у Бельгіі. 10 прац з канцэпцыямі будучых рэформ у Беларусі напісана ўдзельнікамі кампаніі. Адбылося абмеркаванне 6 канцэпцый будучых рэформ у Беларусі, прапанаваных запрошанымі экспертамі, якое прыцягнула больш за 680 каментароў удзельнікаў кампаніі. Створана Кадравая матрыца — прастора, дзе ўдзельнікі кампаніі могуць пазначыць, на якіх пасадах бачаць сябе ў Новай Беларусі. Праведзена анлайн-сустрэча «Шлях да дэмакратыі: прапановы і магчымасці» для ўдзельнікаў «Кадравага Рэзерву» з прадстаўнікамі дэмакратычных сіл. 7 відэа-інтэрв'ю з удзельнікамі кампаніі «Кадравы Рэзерв» аб бачанні рэформ у Новай Беларусі. 2 цыклы анлайн-лекцый: з удзелам літоўскіх палітычных і грамадскіх дзеячаў; цыкл лекцый «Спецкурс: Шлях да дэмакратычнай Беларусі» з прыцягненнем выбітных беларускіх навукоўцаў і аналітыкаў. Па выніках года ў Кадравым Рэзерве знаходзіцца 700 удзельнікаў, 30% з якіх знаходзяцца ў Беларусі. Дадаткова: Каманда НАУ аказала фінансавую падтрымку Беларускай асацыяцыі палітвязняў «Да Волі» ў памеры каля 2,5 тысяч злотых. Чальцы НАУ Павел Латушка і Уладзімір Астапенка працягваюць падтрымку дыпламатычнага курса «Новыя кадры для Новай Беларусі» ў рамках праекта Цэнтра даследаванняў Усходняй Еўропы Варшаўскага ўніверсітэта. За час рэалізацыі праграмы дыпломы атрымалі 74 выпускнікі. Распрацавана і прынята стратэгія дэмакратычных сіл на бязвыбары-2025, а таксама праведзены мерапрыемствы па тэматыцы транзіту ўлады: «Шляхі выхаду з палітычнага крызісу ў Беларусі на прыкладзе польскага Круглага стала» і «Ад Саюзнай дзяржавы да транзіту ўлады», у межах апошняга з якіх распрацаваны базавы дакумент па транзіце ўлады ў Беларусі. Сумесна з Беларускай асацыяцыяй палітвязняў «Да Волі» ў рамках праекта «Зямля» аказана падтрымка ў атрыманні 126 віз, у тым ліку 117 гуманітарных віз для беларусаў, якіх пераследуе рэжым Лукашэнкі. Прадстаўнікі НАУ сталі ўдзельнікамі працоўнай групы па пытаннях, звязаных са знаходжаннем грамадзян Беларусі ў Польшчы, паміж Міністэрствам унутраных спраў Польшчы і прадстаўнікамі беларускіх дэмакратычных сіл; працоўнай групы па пытаннях супрацоўніцтва з няўрадавымі арганізацыямі, заснаванай Міжведамаснай працоўнай групай Польшчы па пытаннях міграцыі. Далучайцеся да нас у сацыяльных сетках: Telegram Instagram YouTube YouTube PL Twitter Facebook Viber TikTok TikTok PL LinkedIn Народнае антыкрызіснае ўпраўленне: Telegram Instagram YouTube Twitter Facebook Сайт TikTok Музей Вольнай Беларусі: Instagram Facebook

Тэма Беларусі будзе адным з прыярытэтаў падчас старшынства Польшчы ў ЕС – адзначыла намесніца міністра замежных спраў Польшчы Хенрыка Масціцкая-Дэндыс  на сустрэчы з намеснікам кіраўніцы Кабінета, кіраўніком НАУ Паўлам Латушкам . З 1 студзеня 2025 года пачынаецца старшынства Польшчы ў Еўрапейскім саюзе. Прадстаўніца МЗС Польшчы адзначыла, што адным з галоўных прыярытэтаў падчас старшынства Польшчы ў ЕС будзе падтрымка дэмакратычных памкненняў беларусаў.  Адной з першых важнейшых падзей падчас старшынства Польшчы ў ЕС стане і правядзенне ў пачатку лютага 2025 года па ініцыятыве Міністра замежных спраў Польшчы Радаслава Сікорскага  «Kościuszko Forum» – канферэнцыі высокага ўзроўню. Да ўдзелу ў мерапрыемстве плануецца запрасіць як кіраўнікоў шэрагу міністэрстваў замежных спраў еўрапейскіх краін, так і кіраўніцу і прадстаўнікоў Аб’яднанага Пераходнага Кабінета, Каардынацыйнай Рады, а таксама іншых прадстаўнікоў беларускай дэмакратычнай супольнасці. Павел Латушка выказаў удзячнасць Польшчы як члену Еўрапейскага саюза за арганізацыю «Беларускага Тыдня» ў Бруселі, які стаў важным сігналам падтрымкі для беларускай дэмакратычнай супольнасці, а таксама адзначыў важнасць 4-га пасяджэння кансультатыўнай групы «Беларусь – ЕС», якая з’яўляецца эфектыўным інструментам узаемадзеяння дэмакратычнай супольнасці Беларусі і ЕС. Асобна Павел Латушка праінфармаваў намесніцу міністра замежных спраў аб павелічэнні рэпрэсій у Беларусі напярэдадні г.зв. выбараў. Павел Латушка і Хенрыка Масціцкая-Дэндыс пагадзіліся, што сёння няма ніякіх падстаў і ўмоў, каб назваць фарс, які арганізуе рэжым, дэмакратычнымі і празрыстымі выбарамі. Польшча будзе ўдзельнічаць у падрыхтоўцы агульнай пазіцыі Еўрапейскага саюза, якая, як плануецца, будзе агучана адразу пасля 26 студзеня 2025 года.  Падчас сустрэчы абмяркоўвалася тэма прыцягнення да адказнасці Лукашэнкі і яго саўдзельнікаў за здзейсненыя злачынствы супраць чалавечнасці ў адносінах да беларускага народа і ваенныя злачынствы супраць украінскага народа. Павел Латушка звярнуўся з просьбай падтрымаць зварот Урада Літвы ў Міжнародны крымінальны суд, а таксама прадставіў прававыя абгрунтаванні магчымага выкарыстання інструментаў МКС для прыцягнення Лукашэнкі да адказнасці. Хенрыка Масціцкая-Дэндыс адзначыла, што Польшча палітычна падтрымлівае дадзены крок. Асобна былі прадстаўлены магчымасці выкарыстання механізмаў АБСЕ на шляху дасягнення адказнасці для прадстаўнікоў рэжыму Лукашэнкі.  Пры ўдзеле дырэктаркі консульскага дэпартамента МЗС Польшчы Юстыны Хжаноўскай  асобна былі абмеркаваныя візавыя пытанні і пытанні легалізацыі беларусаў у Польшчы, у тым ліку праблемныя пытанні выдачы віз на падставе запрашэнняў беларусаў, якія маюць міжнародную абарону ў Польшчы. Павел Латушка падзякаваў польскаму боку за падтрымку ў выдачы гуманітарных віз беларусам, якія вымушана пакідаюць краіну ў сувязі з пагрозай рэпрэсій.

Першы намеснік міністра замежных спраў Польшчы Анджэй Шэйна  падчас сустрэчы з намеснікам кіраўніцы Аб'яднанага Пераходнага Кабінета Беларусі, кіраўніком Народнага антыкрызіснага ўпраўлення Паўлам Латушкам  адзначыў, што падчас старшынства Польшчы ў ЕС краіна будзе працягваць адстойваць падыход санкцыйнага ціску на рэжым Лукашэнкі, а таксама падтрымку дэмакратычных сіл Беларусі. Пазіцыя МЗС Польшчы ў адносінах да рэжыму Лукашэнкі застаецца «незменнай і цвёрдай» . Падчас сустрэчы Павел Латушка перадаў Анджэю Шэйну памятную запіску, падрыхтаваную Народным антыкрызісным упраўленнем на аснове даных беларускіх праваабарончых арганізацый, у якой адлюстраваны маштаб палітычных рэпрэсій, якія працягваюць узмацняцца ў Беларусі на фоне спробаў Лукашэнкі зноў прызначыць сябе на захопленую пасаду прэзідэнта. Павел Латушка асабліва звярнуў увагу на тое, што фактычна ў Беларусі рэалізуецца падыход часоў сталінізму — рэпрэсіі закранаюць цэлыя сем’і. Першы намеснік міністра замежных спраў Польшчы таксама адзначыў, што прызначэнне Адама Халацынскага  спецыяльным прадстаўніком Міністра замежных спраў Польшчы па сувязях з дэмакратычнымі сіламі Беларусі з'яўляецца важным сігналам аб прыярытэтнасці падтрымкі беларускіх дэмакратычных сіл. Анджэй Шэйна падкрэсліў, што няма падстаў чакаць дэмакратычных і празрыстых выбараў, бо Лукашэнка працягвае палітыку рэпрэсій супраць беларусаў. «Мы гэта бачым і разумеем. Польскі бок не застаецца абыякавым» , — дадаў Анджэй Шэйна. Таксама падчас сустрэчы было закранута пытанне магчымых падыходаў да вызвалення палітычных зняволеных у Беларусі і абмеркаваны варыянты міжнароднага пасярэдніцтва. Намеснік кіраўніцы Аб'яднанага Пераходнага Кабінета таксама звярнуўся да Анджэя Шэйны, які адначасова з'яўляецца дэпутатам Сейма Польшчы, з просьбай падтрымкі польскім бокам афіцыйнай дэлегацыі Каардынацыйнай Рады Беларусі, якая ўпершыню прыме ўдзел у пасяджэнні Парламенцкай асамблеі Савета Еўропы 27–31 студзеня 2025 года . Анджэй Шэйна падкрэсліў важнасць таго, што дакладчыкам ПАСЕ па Беларусі прызначаны дэпутат Сейма Польшчы Рышард Петру , і выказаў гатоўнасць польскай місіі пры Савеце Еўропы аказваць садзейнічанне ў працы беларускай дэлегацыі. Павел Латушка акцэнтаваў увагу на тым, што для дэмакратычных сіл важна, каб у момант магчымых перамоваў па Украіне тэма Беларусі не засталася па-за ўвагай . Гэтае пытанне, безумоўна, патрабуе дадатковых кансультацый з украінскім бокам і Еўрапейскім саюзам. Асобна Павел Латушка адзначыў магчымую вядучую ролю Польшчы ў гэтым пытанні, якая з 1 студзеня 2025 года прыме старшынства ў ЕС. «Лукашэнка не мае права прадстаўляць Беларусь на гэтых перамовах, бо ён страціў суб'ектнасць і не можа гаварыць ад імя беларускага народа. Важна, каб голас дэмакратычнай большасці беларускага грамадства быў пачуты падчас гэтых перамоў», — падкрэсліў Павел Латушка.