Павел Латушка звярнуўся да Генеральнага сакратара АБСЕ напярэдадні яго візіту ў Мінск
Намеснік кіраўніцы Аб’яднанага Пераходнага Кабінета Павел Латушка накіраваў ліст Генеральнаму сакратару Арганізацыі па бяспецы і супрацоўніцтве ў Еўропе (АБСЕ) Ферыдуну Сінірліаглу напярэдадні яго ўдзелу ў Мінскай канферэнцыі па еўразійскай бяспецы, якая пройдзе 3–4 лістапада.
У сваім звароце Павел Латушка праінфармаваў Генеральнага сакратара АБСЕ пра колькасць палітычных зняволеных, якія сёння ўтрымліваюцца ў беларускіх турмах, і звярнуў увагу на беспрэцэдэнтныя маштабы палітычных рэпрэсій у Беларусі. Ён заклікаў Генеральнага сакратара падчас візіту ў Мінск узняць пытанне вызвалення ўсіх палітвязняў і спынення пераследу за палітычныя погляды.
Асобную ўвагу ў лісце Павел Латушка надаў пытанням рэгіянальнай бяспекі. Ён падкрэсліў, што Беларусь павінна стаць краінай, якая гарантуе бяспеку і стабільнасць у рэгіёне. Аднак пакуль Лукашэнка застаецца ва ўладзе, пра надзейныя гарантыі бяспекі гаварыць не даводзіцца.
У якасці аргумента Павел Латушка нагадаў, што беларуская тэрыторыя была выкарыстаная для расійскай агрэсіі супраць Украіны. Рэжым таксама працягвае гібрыдныя агрэсіўныя дзеянні супраць суседніх дзяржаў — удзельніц АБСЕ і спрыяе дыверсійнай дзейнасці на іх тэрыторыях.
У якасці аднаго са шляхоў выхаду з глыбокага ўнутрыпалітычнага крызісу Павел Латушка прапанаваў Генеральнаму сакратару АБСЕ заклікаць фактычныя беларускія ўлады распачаць інклюзіўны дыялог з грамадзянскай супольнасцю.
Павел Латушка адзначыў:
«Як намеснік кіраўніцы Аб’яднанага Пераходнага Кабінета і лідар найбуйнейшай фракцыі ў Каардынацыйнай Радзе, я лічу прынцыпова важным, каб нашы партнёры прытрымліваліся цвёрдай пазіцыі ў дачыненні да рэжыму Лукашэнкі і дзейнічалі стратэгічна. Нашай канчатковай мэтай павінны заставацца сістэмныя змены ў Беларусі».
У лісце Павел Латушка таксама выклаў 10 умоў, неабходных для нармалізацыі адносін паміж рэжымам Лукашэнкі і дэмакратычнымі краінамі:
Спыненне рэпрэсій і вызваленне ўсіх палітычных зняволеных.
Забеспячэнне свабоднага вяртання беларускіх эмігрантаў, актывістаў і палітыкаў з гарантыямі абароны ад пераследу.
Дэкрыміналізацыя палітычнай і грамадскай дзейнасці ў Беларусі, у тым ліку дзейнасці палітычных партый і няўрадавых арганізацый.
Дэкрыміналізацыя дзейнасці незалежных СМІ ў Беларусі.
Змена палітычна матываванай правапрымяняльнай практыкі праваахоўных органаў пры ажыццяўленні крымінальнага пераследу палітыкаў і прадстаўнікоў грамадзянскай супольнасці.
Адмена нарматыўных актаў, якія абмяжоўваюць правы беларусаў за мяжой, у тым ліку на атрыманне пашпартных і натарыяльных паслуг і ўдзел у выбарах з-за мяжы, а таксама спыненне транснацыянальных рэпрэсій.
Правядзенне круглага стала з дэмакратычнымі сіламі.
Спыненне ўдзелу Беларусі ў вайне і падтрымкі расійскай агрэсіі.
Рэабілітацыя незаконна асуджаных і рэпрэсаваных асоб, адмена ўсіх палітычна матываваных рашэнняў па крымінальных і адміністрацыйных справах.
Вяртанне канфіскаванай і адабранай маёмасці.
Павел Латушка падкрэсліў, што выкананне гэтых умоў, уключаючы правядзенне круглага стала паміж дэмакратычнымі сіламі і рэжымам, будзе спрыяць умацаванню незалежнасці і суверэнітэту Беларусі, а таксама бяспекі ўсяго рэгіёна.
Comments