Прыцягненне Лукашэнкі да адказнасці за злачынства агрэсіі мае ключавое значэнне для аднаўлення правоў тысяч украінскіх грамадзян

Павел Паўлавіч Латушка: Намеснік кіраўніцы Аб'яднанага Пераходнага Кабінета Беларусі, прадстаўнік АПК па транзіце ўлады. Кіраўнік Народнага антыкрызіснага ўпраўлення, Лідар фракцыі «Каманда Латушкі і Рух "За Свабоду"» у складзе Каардынацыйнай Рады 3-га склікання.

«Дзеянні ваенна-палітычнага кіраўніцтва рэжыму Лукашэнкі, якія прывялі да акта агрэсіі з боку Беларусі супраць Украіны, павінны быць належным чынам задакументаваныя. Менавіта гэтую працу цяпер ажыццяўляе Народнае антыкрызіснае ўпраўленне», — адзначыў дэлегат Каардынацыйнай рады, чалец беларускай дэлегацыі ў Парламенцкай асамблеі Рады Еўропы Павел Латушка падчас пасяджэння Камітэта ПАРЕ па прававых пытаннях і правах чалавека.

«Прадставіўшы тэрыторыю Беларусі для ракетных і авіяцыйных удараў, а таксама для наземнага ўварвання расійскай арміі, Аляксандр Лукашэнка і іншыя прадстаўнікі яго рэжыму ўчынілі злачынства агрэсіі ў адпаведнасці з нормамі міжнароднага крымінальнага права, у тым ліку ў трактоўцы, замацаванай у Статуце Спецыяльнага трыбунала.

Прыцягненне Аляксандра Лукашэнкі да адказнасці за злачынства агрэсіі мае ключавое значэнне для аднаўлення правоў тысяч украінскіх мірных грамадзян, якія пацярпелі ў выніку ракетных і авіяцыйных удараў, а таксама тых, хто быў гвалтоўна перамешчаны з тэрыторыі Украіны ў Беларусь і Расію, многія з якіх па гэты дзень застаюцца ў месцах інтэрнавання і падвяргаюцца катаванням.

Заклікаю не забываць пра ролю ваенна-палітычнага кіраўніцтва Беларусі ў агрэсіўнай вайне супраць Украіны», — заявіў Павел Латушка.

Поўнае выступленне Паўла Латушкі падчас пасяджэння Камітэта ПАРЕ па прававых пытаннях і правах чалавека.

---