Каментарый НАУ ў сувязі з новымі санкцыямі ЗША і Канады супраць рэжыму
Офіс кантролю за замежнымі актывамі Казначэйства ЗША (OFAC) увёў санкцыі супраць 12 арганізацый і 10 асоб за падтрымку рэжымам Лукашэнкі агрэсіі Расіі супраць Украіны і дапамогу ў абыходзе санкцый. Гэта датычыцца дзяржаўных прадпрыемстваў і ключавых кампаній у абаронным сектары Беларусі. Дзеянні ЗША каардынаваліся з Канадай, якая таксама ўвяла санкцыі. Новыя пакеты пацвярджаюць міжнародныя дзеянні супраць антыдэмакратычнай дзейнасці рэжыму Лукашэнкі і магчымасці зарабляць на падтрымцы вайны Расіі супраць Украіны.
Доўгі час НАУ звяртала ўвагу на наяўнасць шырокіх сетак, прызначаных для абыходу міжнародных санкцый і падтрымкі расійскага ВПК. Пастанова OFAC пацвярджае нашыя высновы, дэманструючы ўцягнутасць беларускіх дзяржпрадпрыемстваў у падтрымку агрэсіўных дзеянняў Расіі.
Важна адзначыць, што ў раскрыцці некаторых з гэтых схем актыўны ўдзел прымалі дэмсілы. Таксама мы адзначаем, што шэраг асоб і арганізацый, якія трапілі ў санкцыйны спіс Канады, былі прапанаваныя па нашай ініцыятыве.
Адна з сетак, звязаная з кампаніяй Black Shield, на працягу амаль 10 гадоў займалася продажам зброі для выкарыстання яе ў многіх ваенных канфліктах у Азіі і Афрыцы. Гэта падкрэслівае крывадушнасць рэжыму, які працягвае называць сябе міралюбным, у той час як зброя з Беларусі актыўна выкарыстоўваецца ў зонах ваенных дзеянняў у самых бедных краінах свету.
На жаль, урокі, якія павінны былі быць засвоены рэжымам і набліжанымі да яго бізнес-структурамі, застаюцца па-за ўвагай. Яны па-ранейшаму гатовыя ігнараваць міжнароднае права, ствараючы новыя кампаніі-пракладкі для абыходу санкцый. Гэтая бясконцая гульня ў кошкі-мышкі можа быць спыненая толькі рашучымі мерамі, накіраванымі на знішчэнне кораня праблемы.
Мы заклікаем міжнародную супольнасць да больш жорсткіх дзеянняў, якія дапамогуць спыніць гэтую разбуральную дзейнасць рэжыму Лукашэнкі.